09.12.2021 15:34
Ana səhifə | Haqqımızda | Bizimlə əlaqə  
    
 
  Son tərcümələr

  Azərbaycana “Nobel”li ziyarət
 
08.12.2021
Hürriyet, Türkiyə
 

  Azərbaycan 10 erməni hərbi əsiri azad edib
 
07.12.2021
L’Orient-Le Jour, Fransa
 

  İran və Azərbaycan prezidentlərinin görüşünə baxış
 
02.12.2021
Nournews, İran
 

  Yaxın Şərq və Avrasiyada sülh mümkündürmü?
 
02.12.2021
THE JERUSALEM POST, İsrail
 

  Rusiya Ermənistanla Azərbaycan arasında sülhə töhfə verməyə çalışır
 
01.12.2021
Eureporter, Aİ
 

 
 
Azərbaycanda ortaq qürur!

 
 



Yeni Asır, Türkiyə
28.10.2021


Müəllif: Bülənt Erandaç

Açılış mərasimində Türkiyə Prezidenti Rəcəb Tayyib Ərdoğanın da iştirak etdiyi Füzuli Beynəlxalq Hava Limanı türk dünyasını birləşdirən nöqtə olacaq. Naxçıvana açılacaq dəhlizlə Türkiyə-Orta Asiya əlaqələrində yeni mərhələ başlayacaq.

Prezidentimiz Rəcəb Tayyib Ərdoğan Füzuli Beynəlxalq Hava Limanına enən ilk dövlət başçısı oldu. Azərbaycanla Türkiyənin Ermənistanın işğalından azad etdikləri Qarabağ torpağında Füzuli aeroportu bir qürur abidəsi kimi ucaldılıb. O, sadəcə bir hava limanı deyil. O, ortaq qürur, ortaq həyəcan, ortaq ürək döyüntüsü, ortaq gələcək rəmzidir. O, 21-ci əsrdə iz qoyacaq türk dövlətləri birliyinin qərlbidir. Türk dövlətlərinin birləşmə nöqtəsi Füzuli xeyirli olsun...

Füzuli şəhərinin önəmi

Türkiyənin də yanında yer aldığı Azərbaycanın böyük zəfərə gedən yolunda dönüş nöqtəsi Füzuli olub. Füzuli şəhərinin azad edilməsi ilə Dağlıq Qarabağın geri qaytarılması yolunda önəmli cəbhə açılacaqdı. Bəli, Füzulinin azad olunması savaşın gedişini dəyişəcəkdi. Ən ciddi müdafiə xətləri məhz burada idi. Odur ki, Füzulidə üstünlüyə yiyələnməyin böyük önəmi var idi. Bu, həm Ermənistanın təslim olması demək olacaqdı, həm də Azərbaycanla bərabər Türkiyə və digər türk dövlətlərinin mənəvi zəfəri. Füzulinin azad olunması ilə Azərbaycan Ordusu Qarabağın qəlbi olan Xocalı, Ağdam və Şuşa istiqamətində önəmli mövqe əldə edəcəkdi…

Türk dövlətləri xətti

Prezident Rəcəb Tayyib Ərdoğanın türk dövlətləri birliyi paradiqmasında Dağlıq Qarabağın Ermənistanın işğalından azad edilməsi çox həyati mövzuya çevrilmişdi. Türkiyə ilə Azərbaycanın birliyi türk dövlətləri arasında ortaq həyəcan, ortaq hisslər, birgə ürək döyüntüsü yaradır. Dağlıq Qarabağın erməni işğalından azad edilməsi ilə Azərbaycan-Türkiyə birliyi yeni dünya düzəni formalaşdırır. İndi Qafqazda qüvvələr nisbəti dəyişib, Türkiyə regionda ən azı Rusiya qədər önəmli gücə çevrilib.

Quru yolu dəhlizi açılır

Türkiyə ilə Azərbaycan arasında düz 1 əsr sonra ilk dəfə birbaşa quru yolu əlaqəsi yaranacaq. İndi Azərbaycanın qərb rayonları ilə Naxçıvan Muxtar Respublikası arasında nəqliyyat və kommunikasiya əlaqələri qurulacaq. Açılacaq Naxçıvan dəhlizi regional güc balansında, həmçinin Türkiyə-Orta Asiya əlaqələrində yeni mərhələnin başlanğıcı olacaq. Bu, türk dünyasının bütünlüyü baxımından böyük əhəmiyyət kəsb edir. Naxçıvanla Azərbaycanın əsas hissəsi arasında quru yolu ilə əlaqə 1920-ci ildə kəsilib. İndi burada dəhlizin açılması Şərqlə Qərb arasında körpünün bərpası baxımından da önəmlidir.

Bu dəhliz Orta Asiyadan Xəzər dənizi vasitəsi ilə birbaşa Türkiyəyə yol açacaq, bununla da türk dünyasının birləşməsini təmin edəcək. Beləliklə, Qarabağ zəfərinin ardından nəqliyyat əlaqələri sahəsində də yeni nailiyyətlərin əldə olunacağı ortadadır. Bu, Bakı-Tbilisi-Qars marşrutuna güclü dəstək olacaq, nəticədə tarixi İpək Yolunun canlanmasına imkan verəcək. Xüsusilə Zəngəzur dəhlizi tarixi yaxınlaşmalara yol açacaq. Türkiyə ilə Orta Asiyanın türk dövlətləri arasında birbaşa əlaqənin qurulması geosiyasi baxımdan son dərəcə önəmli güc mərkəzinin yaranmasına şərait yaradacaq. Bu gün Türkiyə ilə Rusiya regionun əsas iki oyunçularıdır. Rusiya lideri Putin də prosesləri çox düzgün qiymətləndirərək, prezident Ərdoğan ilə ortaq, uzunmüddətli strateji məsələləri gündəmə gətirməkdədir. Türkiyənin Cənubi Qafqaza təsir imkanlarını artırması Rusiyanı narahat etsə də, Moskva regionda Türkiyə gerçəkliyini qəbul etməyə məcburdur. Bu gün Ankara Cənubi Qafqazda iki böyük gücdən biri və Avropa ilə Asiya arasında körpüdür.

Nəticə

İnşallah Füzuli türk dünyasının birləşmə nöqtəsi olacaq. Türkiyə-Azərbaycan birliyi Asiyanı da qucaqlayaraq, 21-ci əsrin türklərin əsri olmasına yol açacaq. Hədəf birləşmiş türk dövlətləridir. Daha ədalətli dünyanın açarı budur!

(Türk dilindən tərcümə - WorldMedia.Az)

Mənbə: Yeni Asır

 
          

Saytın materiallarından istifadə zamanı worldmedia.az-a istinad mütləqdir  

© 2016-2021, WorldMedia.az